“अप्सरा” चित्रपट 10 मे पासून संपूर्ण महाराष्ट्रात..!
– “श्रवण फिल्म्स” निर्मिती संस्थेचे सुनील भालेराव यांची माहिती
– चित्रपटात प्रेम, सुमधुर संगीत, राजकारण व ॲक्शनची मेजवानी
कोल्हापूर : (“लोकमानस न्यूज 4” – विशेष प्रतिनिधी नंदकुमार तेली).
“श्रवण फिल्म्स” निर्मित अप्सरा चित्रपट दि 10 मे 2024 रोजीपासून संपूर्ण महाराष्ट्रातील चित्रपटगृहामध्ये प्रदर्शित होणार आहे. “श्रवण फिल्म्स”ची हा चित्रपट पहिलीच निर्मिती आहे. नवीन कलाकार असलेल्या या चित्रपटात प्रेम, सुमधुर संगीत, राजकारण व ॲक्शनची मेजवानी असणार आहे., अशी माहिती “श्रवण फिल्म्स” निर्मिती संस्थेचे सुनील भालेराव यांनी पत्रकार परिषदेत दिली.
– या चित्रपटात आहे “तगडी स्टारकास्ट”
अभिनेता सुयश झुंजूरके, अभिनेत्री मयुरी आव्हाड, अक्षता पाडगावकर, अभिनेत्री मेघा घाडगे, शशांक शेंडे, विठ्ठल काळे, मयूर पवार, खानदेशरत्न सचिन कुमावत, विजय निकम, राजेश भोसले, आशिष वारंग, समीक्षा भालेराव, प्रज्ञा त्रिभुवन, संघर्ष भालेराव अशी तगडी नवख्या युवा स्टारकास्टने या चित्रपटात उत्कृष्ट असा कलाविष्कार सादर केला आहे. तसेच छायांकन राजा फडतरे, संकलन निलेश राठोड तर नृत्यदिग्दर्शन सुबोध आरेकर, इमरान मालगुणकर, कृतिक माझीरे यांनी केले आहे.
– सुमधुर आवाजात चित्रपटातील गीते स्वरबद्ध
चित्रपट सृष्टीत अनेक वर्ष कार्यरत असलेल्या चंद्रकांत पवार यांनी या चित्रपटाची कथा पटकथा आणि दिग्दर्शन केले आहे. चित्रपटातील तीनही गाण्यांचं लेखन आणि संगीत दिग्दर्शन मंगेश यांनी केले असून या चित्रपटाच्या निमित्ताने त्यांनी संगीत दिग्दर्शक म्हणून पदार्पण केले आहे. गायक अभय जोधपुरकर गायिका आनंदी जोशी, ओंकार स्वरूप, भैय्या मोरे, मेघा मुसळे यांच्या सुमधुर आवाजात चित्रपटातील गीते स्वरबद्ध करण्यात आली आहेत. ही गीते प्रेक्षकांच्या पसंतीस उतरली आहेत.
– अशी आहे चित्रपटाची “कथा”
एका तरुणाच्या मनात असलेलं एका अप्सरेचं चित्र, त्याला भेटणारी तरुणी, त्यांचं बदलणारं आयुष्य या संकल्पनेवर “अप्सरा” या चित्रपटाची निर्मिती करण्यात आली आहे. एक अनोखी प्रेम कथा असलेल्या “अप्सरा” या चित्रपटाच्या ट्रेलर मधून कथेचा थोडाफार अंदाज बांधता येतो. तरुणाला भेटणारी त्याच्या मनातली अप्सरा आणि त्यानंतर होणार राजकारण त्या सगळ्याला तो तरुण कसा सामोरे जातो. याचं कथानक चित्रपटात पाहायला मिळणार आहे. सुरेल गाणी, उत्तम अभिनय या सर्वांना ॲक्शनची जोड ही कमालीची आहे. त्यामुळे अप्सरा चित्रपट हा प्रेक्षकांचे पुरेपूर मनोरंजन करणारा ठरेल, यात शंका नाही.