“परंपरा” चित्रपट प्रेक्षकांच्या मनावर खोलवर परिणाम करणारा ठरेल
– अभिनेते मिलिंद शिंदे यांची माहिती
– अनेक आंतरराष्ट्रीय महोत्सवात गौरवलेला “परंपरा” चित्रपट 26 एप्रिलला प्रेक्षकांच्या भेटीला
कोल्हापूर : (“लोकमानस न्यूज 4” – विशेष प्रतिनिधी).
प्रतिकूल परिस्थितीतही परंपरेच्या जपणुकीवर लक्ष केंद्रित करणारा “परंपरा” हा चित्रपट आहे. विशेषतः महाराष्ट्रातील जिथे सांस्कृतिक वारसा खूप महत्त्वाचा आहे. “परंपरा” या चित्रपटात मांडण्यात आलेले कथानक प्रेक्षकांच्या मनावर खोलवर परिणाम करणारे ठरेल. हा चित्रपट 26 एप्रिल 2024 रोजी प्रेक्षकांच्या भेटीला येत आहे., अशी माहिती अभिनेते मिलिंद शिंदे यांनी के ट्री हॉटेलच्या हॉलमध्ये झालेल्या पत्रकार परिषदेत दिली.
यावेळी बोलताना अभिनेते मिलिंद शिंदे म्हणाले, समाजाने जबरदस्तीने लाभलेल्या परंपरेचा एका कुटुंबावर होणारा परिणाम कथानकाद्वारे या चित्रपटात दाखवण्यात आला आहे. एकंदरीत परंपरा हा चित्रपट केवळ मनोरंजनच नाही, तर आजच्या बदलत्या जगात वारसा आणि परंपरेचे महत्त्व दर्शवणारा आहे. त्याशिवाय ग्रामीण भागातील शेतकरी कुटुंबाचं जगणं, सामाजिक ताण याचे दर्शनही हा चित्रपट घडवतो. तसेच अनेक आंतरराष्ट्रीय महोत्सवात गौरवलेला हा चित्रपट प्रेक्षकांना नक्कीच अंतर्मुख करेल याच शंका नाही. असेही यावेळी त्यांनी सांगितले.
यानंतर बोलताना हरीश कुमार व अँड्र्यू रिबेलो म्हणाले, स्टार गेट मुव्हीज या निर्मिती संस्थेअंतर्गत परंपरा या चित्रपटाची निर्मिती केली असून फैजल पोपरे हे या चित्रपटाचे सहनिर्माते आहेत तर दिग्दर्शन प्रणय निशाकांत तेलंग यांचे आहे. तसेच अभिनेते मिलिंद शिंदे आणि अभिनेत्री विना जामकर यांच्यासह प्रकाश धोत्रे, अरुण कदम, नम्रता पावसकर, किशोर रावराणे, जयराज नायर, रोहित चव्हाण, प्रशांत नेमण, भूषण घाडी, मास्टर मच्छिंद्र, दिवंगत अभिनेते जनार्दन परब यांचा दमदार अभियान हे या चित्रपटाचे वैशिष्ट्य आहे.
पुढे बोलताना ते म्हणाले, चित्रपटाची पटकथा निशाकांत तेलंग आणि संजय सावंत यांची असून छायाचित्र निशा तेलंग यांनी केले आहे. मंगेश कांगणे यांनी लिहिलेल्या घेताना आनंद मेनन यांचे मधुर संगीत लाभले आहे. श्रीकांत तेलंग यांनी संकलक म्हणून काम पाहिले आहे तर पार्श्वसंगीत विजय गवंडे यांचे आहे. परंपरा एक समृद्ध सिनेमॅटिक अनुभव देण्यास तयार आहे. “परंपरा” हा चित्रपट 26 एप्रिल रोजी प्रेक्षकांच्या भेटीला येत आहे. या चित्रपटाचा ट्रेलर नुकताच लॉन्च करण्यात आला असून उत्तम अभिनय, श्रवणीय संगीत, आशयघन कथानक असलेल्या या चित्रपटाविषयी या ट्रेलरने उत्सुकता निर्माण केली आहे. या पत्रकार परिषदेवेळी निर्माते, दिग्दर्शक व कलाकार टीम उपस्थित होती.